DIE REISENDE KARNAVAL
Die dag ná die rampspoedige Kersspel kuier Ciryllene en Karenza by Melinda. Die vroue drink koffie en Karenza eet roereiers met tamatiesous oor, die tiara op haar kop.
Ciryllene doop ’n stukkie beskuit in haar koffie voordat sy versigtig vra: “Het jy gesien Yvette was gisteraand daar?”
Melinda se hart spring in haar keel. “Nee.”
“Ja, skynbaar laat ingekom, heel agter gaan sit en tydens die chaos met die adder weer verdwyn. Carolus van die slaghuis het my vanoggend vertel. En hy’t gesê sy was verlede jaar ook daar, hy is byna seker daarvan.”
Melinda staan op, maar gaan sit dadelik weer. Yvette by die konsert? Hoekom?
Sy wip toe haar selfoon skielik piep. ’n WhatsApp-boodskap van Suzi: Ons het die slang gevang. Gifkliere wel uit, lees sy hardop.
“Nou is Suzi seker op hul case oor die gifkliere,” sê Ciryllene verlig.
