Kurators help ons kies

“Soveel paaie, soveel ompaaie; soveel keuses, soveel foute,” het Sarah Jessica Parker van Sex and the City-faam eenmaal opgemerk oor ’n ooraanbod van dinge om te koop.

Is daar té veel om uit te kies, koop jy dikwels niks of skram van die ervaring weg. Jy voel oorweldig. Dit is waar die nuwerwetse kurators hul buiging kom maak – hulle help ons kies. Moet hulle egter nie verwar met die tradisionele kurators wat museumstukke versorg of kunsitems uitsoek vir uitstallings nie.

“Kurator” kom van die Latynse woord “cura”, wat beteken “omsien na”. Dit was kort ná die aanbreek van die nuwe millennium wat die tendens van die kuratorskap van produkte (“curated consumption”) begin het – toe die wêreld interaktief geraak het. Die internet het ’n nuwe wêreld vir ons almal ontsluit.

Maar dit het ook ’n ooraanbod meegebring van inligting, van enigiets onder die son, wat jy met ’n klik of twee bereik.

Wat die nuwe “verbruiker”-kurators doen, is om die kaf van die koring te skei sodat jy die regte keuse kan maak uit die magdom aanbiedings oor wát om te koop, wátter ervarings om in te belê of watter webblad om te lees.

Soos die Amerikaanse ontwerper Ron Pompei dit