Studente, stres en selfdood

Oefening bly een van die beste maniere om stresvlakke te beheer

Oktober, November is knerstyd. Die jaar jaag ons almal. Maar niks druk tieners en studente so hard soos die eindeksamens nie. Die algehele desperaatheid knou baie. Sommige knak. Party maak ’n einde aan alles. SADAG sê een ondersoek wys dat sowat 20% van studente al selfdood oorweeg het. Hoewel ons universiteite nie syfers oor selfdood onder studente beskikbaar het nie, sê Jerome September, dekaan van studentesake aan die Universiteit van die Witwatersrand, dat dit in Oktober ’n hoogtepunt bereik.

Sielkundiges, opvoedkundiges en ma’s verstaan dit: Jongmense het uiters groot uitdagings. Een van die moeilikstes van die lewe is om jou eie identiteit te vestig en om jou plek in die wêreld in