In die hart van TURKYE
Kappadosië (Kapadokya) is getoor, sestig miljoen jaar gelede toe die berge Erciyes (Argeus), Hasan en Güllü gekook het, vuur en rots gespoeg het en lae as oor die hoogland geblaas het. Toe die berge bedaar, het wind en water ’n surrealistiese toneel in sentraal Anatolië bewerk. Onderstebo keëls, torings, minarette, feëskoorstene en reusesampioene van tot veertig meter hoog het verskyn, en onder die harde basalt was die binnerots sag genoeg om huise, skuilings en kerke uit te kalwe.
Die naam beteken “Land van pragtige perde”, sê die reisbrosjures. Navorsers stry. Dié naam het sowat 500 v.C. gedurende die regering van Darius die Grote op ’n inskripsie in Persië verskyn. Daar is ook perde op die inskripsie, ’n geskenk uit die streek aan die Persiese koning. Party reken die naam kom eerder van Khepat, antieke hoofgod van die streek. Ander verbind dit met die Cappadox-spruit, met dieselfde naam as ’n antieke
