Dié sterre LAAT WAAI
Versier en versorg, glansryk en skatryk. Toiingrig en verwaarloos, stapelgek en armoedig. Dit is van die beskrywings wat ’n mens al van aktrises gehoor het. Party mense verhef hulle met onmoontlike verwagtinge tot onaantasbare rolmodelle. Ander gluur op hulle neer met ongeligte vooroordele. Hier is die waarheid ...
Brümilda van Rensburg
TEVREDE GEMOEDSRUS
“Ek leef vir daardie ‘laat waai’-reënboogoomblikke en mooi herinneringe wat gesmee word,” sê die veteraanaktrise Brümilda van Rensburg. “Ek het besef om te gee en om te ontvang is inderwaarheid dieselfde seën!”
Dié omgeemens se loopbaan strek oor vier dekades en op 63 is sy steeds die vergestalting van grasieuse styl.
“Ek kuier graag saam met geliefdes en vriende aan tafel met ’n smulmaal. Daaruit spruit ’n gevoel van behoort en mededeelsaamheid. As ’n vliegtuig se neus lig na ’n vreemde bestemming, ‘laat waai’ ek na waar ek net kan rus en vakansie hou saam met my maatjies. My Samsung is dan nét vir foto’s neem!”
Sy hou daarvan om te help en te deel waar sy kan. “Ek probeer om die wêreld beter te los as
