MARITA vat ons grens toe

Sy woon al meer as twintig jaar in Frankryk – “dis meer as ’n derde van my lewe” – maar skryf nog een stryk deur in haar moedertaal. “Boeke het my van kleins af betower. Ek wou ook eendag met woorde toor en lesers gelukkig maak,” skryf sy uit Frankryk.

Nie baie skrywers is ewe suksesvol in verskillende genres nie, maar Marita is bekend (en bekroon) vir volwasse romans sowel as kinder- en jeugfiksie. Sy is ook bekend as rubriekskrywer en joernalis, en het ook al kortverhale en radiodramas geskryf. “Elke genre het sy eie uitdagings en vreugdes, en ek soek steeds nuwe genres en nuwe uitdagings. Ek het byvoorbeeld pas begin te skryf waarin ek behoorlik my bolla kan losskud en laat waai.”