LIEFDE DEUR DIE TRANE
DIE stamperige rit op die klipperige grondpaadjie na die trouvenue hoog teen die hange van die Magaliesberge herinner vandag aan die moedige stryd wat die minnesanger en sy bruid elk moes deurmaak voor dié heuglike dag.
Maar nie eens die fel somerson kan vanmiddag die vreugde demp nie. In die koelte van die buitelugkapel wag ’n stralende Manie Jackson nou fier en flambojant in ’n blink, geborduurde wit en silwer baadjie. Hy kan nie ophou glimlag nie, want eindelik kan hy en sy fyn blondekopverloofde, Christel Coetzee, saam die pad vorentoe aandurf. Vandag is hul mooiste dag van liefde – hul troudag.
Onder die 190 trougaste wat hul plekke ingeneem het, is daar benewens familielede en hartsvriende ook vele bekende gesigte, soos dié van die sangers Manuel Escórcio, Min Shaw en Clive Bruce, en selfs die oudbokser Jimmy Abbott, te sien.
En dan, kort ná drieuur, maak die fraaie Christel haar verskyning – op die rug van ’n bruin perd, in ’n spierwit skepping van kant en pêrels, met wit velskoene aan haar voete. Haar ouboet, Bennie (40),
