MY BRUILOF SONDER HOM
ALLES was gereed en prentjiemooi vir haar groot dag.
Op die gasteplaas tussen die lowergroen Overberge buite Swellendam was die tafels gedek, versier met woestynrose en heuningblommetjies. Eenkant het die pronkstuk, die troukoek, gewag om gesny te word.
Ook die klankstelsel was reg vir die oomblik wanneer die dansbaan geopen word met Dirk van der Westhuizen se romantiese liedjie “Fairytale”.
En Trudie Swanepoel hét soos ’n sprokiesprinses gevoel in haar bruidsrok; haar hare in ’n keurige kapsel gedoen. Ook die strooimeisies was reeds in hul mosterdkleurige rokkies geklee; die strooijonkers in spierwit hemde met leerkruisbande. Die 60 trougaste en die pastoor het reeds gewag. Die bruidegom was wel ’n bietjie laat . . .
“Nie ek of my familie het gesien nie,” vertel Trudie (27) ons vandag. Eindelik het sy haar aanstaande gebel. En in ’n oogwink is haar toekomsdroom verpletter. “Ek gaan nie kom nie. Kom ons los alles,” het sy Martin Strydom (35) hoor sê.
