金星是暗暝上光 ê 天星。Tī 南半球早春 ê 暗暝，金星會出現 tī 西爿地平線附近。為著欲創作這幅組合景色，翕相 ê 人 tī 9 月 25 踮巴西南部 ê Cascavel 用追蹤天景 kah 固定前景 ê 方式感光。日落了後，金星 to̍h 出現矣。伊浸 tī 黃道光 ê 光錐內底，太陽光 to̍h ùi 太陽系黃道面 內底 ê 塗粉散射--出來。實際上，毋管是 tī 地球北半球抑是南半球，黃道光 ê 光弧若是 kah 地平線 切 ê 角度傷崎，伊 tī 春分彼陣日落了後（抑是秋分彼陣日出進前）to̍h 會變足明顯 ê。日落了後 ê 暗暝，黃道光射 tùi 厚恆星 ê 星場 kah 銀河中心彼个有巨型星際塗粉雲 ê 核球。Ùi 銀河中心 ê 核球 行 tùi 銀河 tī 地平線 ê 方向，你 to̍h 會看著離太陽上近 ê 恆星系統，半人馬座 α。伊離咱 kan-na 4.37 光年遠爾爾。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20211002/ 影像：Rodrigo Guerra 音樂：PiSCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap211002.html Powered by Firstory Hosting