12 月 8 號 是月圓 kah 火圓上倚 ê 時陣。兩粒攏足光 ê，而且 in tī 地球天頂 攏 kah 太陽 tī 相對面。實際上 火星去予月娘閘去矣。咱若是 tiàm 歐洲 kah 北美洲一寡所在看，就會看著火星 ùi 月娘後壁行過。若是 tiàm Slovakia 東爿 ê Kosice 市看，月掩火星 ê 現象就會發生 tī 日出進前。這个迷人 ê 景色 就紀錄 tī 這个望遠鏡 ê 縮時攝影 ê 感光系列內底。這粒紅色行星差不多消失 tī 月娘後壁一點鐘久，才閣 ùi 暖色調 ê 月圓邊仔 出現。這个 2022 年上尾擺 ê 月圓，就 ùi 西爿地平線落去。後一擺出現月掩火星 ê 時陣會 tī 1 月 3 號，彼陣 ê 月娘會是頂膨月。是講 月掩星 干焦會 tiàm 地球表面一寡所在才看有。1 月 3 號 ê 月掩火星愛 tī 南大西洋、南非、kah 印度洋 才看有。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221215/ 影像：Tomas Slovinsky 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221215.html Powered by Firstory Hosting