SJOKOLADEKAASKOEK
Gebruik melk- of donkersjokolade vir dié indrukwekkende, ryk kaaskoek. Onthou net hoe soeter die sjokolade, hoe soeter die koek. Sit dit voor in dun skyfies.
Genoeg vir 1 x 30 cm-kaaskoek
Voorbereiding: 20 minute, plus 1 uur in die yskas
• 3 x 180 g-pakkies Oreo-koekies
VULSEL
• 3 x 210 g-houertjies mediumvetroomkaas
• 125 ml versiersuiker, gesif
• 30 ml kakao, gesif
• 5 ml vanieljegeursel
• 2 plakke (80 g elk) sjokolade, gesmelt • 250 ml room, geklits tot styf
GARNERING
• 1 plak (80 g) donkersjokolade
• ’n paar ekstra koekies, gekrummel
1 Berei die vulsel deur die roomkaas, suiker, kakao, vanielje en sjokolade saam te klits tot net glad. Vou of klits laaste die room by tot net gemeng.
2 As jy ’n 30 cm-koekpan het, kan jy die kaaskoek daarin saamstel. Indien nie, gebruik eenvoudig ’n koekstaander of -bord en pak ’n vryvorm-koek. Begin deur die eerste pakkie koekies styf teen mekaar in ’n sirkel onderin die koekpan of op die bord te pak. Skep ’n derde van die roomkaasmengsel op die koekies en smeer gelyk. Pak nog ’n laag sjokoladekoekies bo-op die vulsel, gevolg deur nog ’n laag vulsel; pak dan weer koekies en eindig met die laaste van die vulsel. Sit die koek in die yskas vir minstens 1 uur of tot gestol.
3 Gebruik ’n groenteskiller en sny sjokoladekrulle van die laaste plak sjokolade; versier die koek daarmee saam met die koekiekrummels.
Stap vir stap
KERSIE-EN-ROOS-GAATJIESKOEK
Bak self (of koop) ’n plaatkoek en toor dit om in ’n Swartwoud-droom met ’n paar eenvoudige ekstras.
Maak 1 koek • Voorbereiding: 15 minute • Baktyd: 45 minute • Oondtemperatuur: 160 °C
• 6 eiers, geskei
• 500 ml strooisuiker
• 250 ml sonneblomolie
• 250 ml koffie, warm
• 500 ml koekmeel, gesif
• 30 ml kakao, gesif
• 30 ml bakpoeier
• ’n knippie sout
VULSEL
• 125 ml kersie- of bessiekonfyt
• 90 ml Nutella of soortgelyke sjokoladesmeer
• 250 ml room
• sowat 15 ml roosstroop (sien wenk)• • •
