HY WAS ’n skelm, en eindelik het almal dit van hom geweet.
Toe sy liggaam laatmiddag op Menseregtedag gevind is, was dit met ’n koeël in die kop op die kuspaadjie naby Kwaaiwater. Die doodsengel het hom nie ongenooid kom haal nie – dit was hý wat besef het hy is vas in ’n hoek, en besluit het sy uitweg is om sy geheime graf toe te neem.
’n Plas bloed het agtergebly, daar naby die branders. ’n Foto van sy laaste lewensbloed wys dit was eers teen skemer dat die mense van Hermanus sou besef: Ons berugste inwoner is weg.
Markus Jooste het miljarde rande laat verdwyn. Hy wou dit nooit erken nie, maar beleggers in sy Steinhoff-sakeryk moes toekyk hoe hul geld toegespin word in ’n web waaruit dit nooit weer sou verskyn nie.
