‘SY LOOP HEELDAG ROND EN BESLUIT BY WATTER KLASSE SY WIL INSTAP’
AS JY haar sien, wil jy haar sommer opvreet, so oulik is sy.
Maar hou jou in. As jy so iets hardop sê, sal die Hoërskool Martin Oosthuizen se 264 leerders, die onderwysers en selfs die res van Kakamas se gemeenskap jou vinnig op jou plek sit.
Op dié dorp doer in die Kalahari is daar selfs een of twee mense wat al vertel hulle het heeltemal opgehou om skaapvleis te eet omdat dié ou diertjie so diep in hul harte geklim het.
Martie die skaap is nie net ’n gewone lam nie. Sy is so hans dat sy al klas loop by dié skool hier in die Noord-Kaap. Sy het blyplek in die skoolkoshuis, die onderwysers span haar in om hulle te help klasgee en die kinders kry skofte om haar oepsies op die terrein op te tel.
Martie het almal aan die praat. Selfs op die skool se aansteekbord, langs ’n ou Landbouweekblad-voorblad uit die 1960’s waarvoor een van die skool se leerlinge die voorbladnooi was, pronk die artikels en foto’s oor Martie.
Wat is hier aan die gang, vra ons in die hoof, André Mouton, se kantoor, waar die lugversorging vandag lekker opgedraai is. Die kwik het al vandeesweek by 45 °C gedraai. “As dit só warm
