‘MY KAROODORP, MY MUSE’
ERIKA VAN ZYL, LANDSKAPSKILDER EN GALERYEIENAAR VAN PRINS ALBERT
Dis ’n byna daaglikse ritueel en een waarvoor Erika van Zyl nooit moeg kan raak nie: Om verder te skilder aan haar geliefde Prins Albert. Hoe dan anders, as hierdie Karoodorp aan die voet van die Swartberg haar muse is. “Elke draai lyk soos ’n doek wat wag om geskilder te word,” vertel Erika, ’n landskapskilder en ook galery-eienaar. “Hierdie dorpie het nie net my kuns gevorm nie, maar ook ’n onmisbare deel van my kreatiewe identiteit geword.”
Sy en haar man, Dewald, bly al vir vier jaar hier. Tog het hul liefdespad met Prins Albert ’n wye draai geloop. In 2003, toe hulle nog in Lephalale, Limpopo, gewoon het, het ’n kliënt Erika gevra om sy geboortedorp te skilder – die einste Prins Albert, ’n dorp waarvan sy nog nooit gehoor