VERHOUDINGS
Die woorde “Ek moet ook alles in hierdie huis doen” is waarskynlik al in elke huis geuiter. In baie huishoudings voel dit inderdaad asof een party meer verantwoordelikhede as die ander een het. Bykomend is daar vir sommige mense ’n “regte” manier van dinge doen. Soos ’n vriendin ’n ruk gelede van haar lewensmaat sê: “Kan jy glo Lisa hang die wasgoed oor op nadat ek dit opgehang het?” Ja, ek kan, dis soos die onlangse meme op sosiale media: In elke huis is daar iemand wat die skottelgoedwasser soos ’n Skandinawiese binnenshuise argitek inpak en een wat dit soos ’n muishond op dwelms doen.
Ons het almal geite, vooropgestelde idees, maar ook uiteenlopende vaardighede, persoonlikhede en agtergronde, wat dit nie makliker maak om saam met ’n ander mens onder een dak te leef nie. Ons doen en dink verskillend – van toentertyd af.
1950 TOT NOU
’n Tydskrifartikel oor rolverdeling in ’n huwelik in die vyftigerjare was waarskynlik resepmatig met ’n lys van hoe ’n huisvrou moet beplan om ’n huishouding te bestuur
