1 OPLAAS TUIS JOHANNES RADEBE, DANSER EN CHOREOGRAAF
Nou: Danser en choreograaf Johannes Radebe, met ’n goedversorgde stoppelbaard en helderblou oogskadu, dra ’n skitterende silwer-pienk-en-blou halternektop. Hy is omring deur vere in skakerings van pienk, geel, oranje en groen. Ook sy hooftooisel, wat met ’n punt tot in die middel van sy voorkop kom, is met kleurvolle vere versier.
Toe: Die klein kannetjie staar na die baldansinstrukteur wat ’n demonstrasie in die plaaslike ontspanningsaal doen. Dis veral sy met-blinkertjiesversierde swaelstertbaadjie wat die seuntjie betower. “Wat moet ek dóén om daardie baadjie te dra?” vra hy ademloos. Waarop die instrukteur antwoord: “Kom klas toe. As jy volhard, kan jy dit dalk dra.”
Die geluksgodin het sekerlik geglimlag. Vandag, as een van die permanente dansers in die Britse treffer-televisieprogram Strictly Come Dancing, beïndruk JoJo gereeld met sy uitrustings. En hy verskuif grense. In 2019 was hy die eerste manlike danser in die Britse Strictly wat dit met hakke op die dansvloer waag. Met sy hoëhakstewels in lakleer het hy op maat van Blondie se “Rapture” dit uitgekap.
Twee jaar later eindig hy en 2012 se-wenner, John Whaite, tweede in die kompetisie. Die eerste manlike danspaar in die geskiedenis. Daarna het hy huis toe gevlieg om – vir die heel eerste keer – met sy ma oor sy seksualiteit te praat.
