‘DIE KRIPTOBEDRYF IS DALK NUUT, MAAR DIÉ SOORT BEDROG IS SO OUD SOOS DIE BERGE’
’N VOORSTE beleggingsmaat skappy van Silicon Valley het eens voorspel Sam Bankman-Fried kon die wêreld se eerste “trillionaire” word.
Destyds het die jong sake-ghoeroe op die oog af geen erg aan rykdom gehad nie. Hy het belowe hy sou al sy geld aan liefdadigheid skenk, en hy het altyd ’n kortbroek en ou T-hemp gedra, selfs wanneer hy ’n verhoog met swaargewigte soos die voormalige Amerikaanse pres. Bill Clinton en gewese Britse premier Tony Blair gedeel het.
Maar die opgewonde praatjies oor “biljoene” en hoe hy die planeet sou red, het nou inmekaargetuimel in een van die grootste finansiële bedrogspulle op rekord.
Die slonsige Amerikaanse kripto-entrepreneur, wat op sy dag deur die sakewêreld “ ’ n outistiese genie” genoem is en tot ’n jaar gelede op die voorblaaie van finansiële tydskrifte gepryk het, het nou ’n nuwe uniform – ’n tronkpak.
Dit was ’n buitengewone val vir ’n goue seun in die tegnowêreld. Sy sakeryk het in ’n kwessie van dae van $25 miljard (omtrent R450 miljard) tot so te sê niks gekrimp. Die 31-jarige “SBF”, soos hy bekendgestaan het, word nou deur 110 jaar tronkstraf in die gesig gestaar.
Ná ’n maand lange verhoor het ’n jurie in Manhattan onlangs net vier ure geneem om hom skuldig te bevind op sewe aanklagte dat hy die kliënte van FTX, sy aanlyn beurs vir digitale geldeenhede, besteel het.
Aanklaers het aan die hof gesê Sam het voorgegee
