Waardetoevoeging
In ’n era waarin verbruikers plaaslike produkte bo ingevoerdes verkies, laat ’n Suid-Afrikaanse boetiek-appelsider Britse siders op hul neus kyk in hul eie supermarkte wat die koolstofspoor betref. Dit is danksy die soet appels uit die sonnige Elginvallei, wat geen suikerbyvoegings nodig het nie, asook omgewingslim produksie- en verspreidingsprosesse.
Laura Clacey en haar man, Karol Ostaszewski, het tien jaar gelede die Sxollie-handelsmerk gestig vir hul sider wat gemaak word van sapgraad Golden Delicious-, Granny Smith- en Cripps Pink-appels wat deur Fruitways by Elgin in die Wes-Kaap verbou word. Die geparste appels word ’n klipgooi van die plaas af in Almenkerk se kelder met vonkelwyngis gegis voor dit in groot maat na die hawe in Liverpool, Brittanje, verskeep word. Digby dié hawe word dit gekarboneer en gebottel, in bottels wat op die perseel vervaardig word.
“Ek en Karol het destyds, toe ons in Suid-Afrika gewoon het, gesoek na iets wat nog nie vantevore gedoen is nie,” vertel Laura.
“Destyds was boetiekbier en -jenewer baie gewild en ek was gek daarna. Hul handelsmerke was cool, hul stories outentiek en alles was inspirerend. Ons wou egter nie meeding in ’n kategorie wat reeds vol was nie, maar eerder ’n kategorie vernuwe en ’n opskudding daarbinne veroorsaak.
“Toe ons na sider begin kyk, was dit eintlik maklik, want as jy aan alkohol dink, dink jy aan bier, sider en wyn.”
As wynliefhebbers was
