Ons almal kan waarskynlik met die Oscarbenoemde fliek The Banshees of Inisherin se storielyn identifiseer: ’n Vriendskap wat sneuwel. Die een klap die vriendskapsdeur toe – terwyl die ander een dit desperaat probeer oopdwing. Seer sekerlik was jy al aan die ontvangkant van so iets. Of dalk was jy die een wat wegstap. Dus weet jy maar te goed: Menslike verhoudings ís ’n taai toffie.
Hel is ander mense, lui die bekende aanhaling uit Jean-Paul Sartre se toneelstuk Huis Clos. Ja, om tussen ander te wees, met al hul kwellings en eise, kan moeilik wees. Om nie te praat van jou eie giere en geite nie. Jy kan nie net, soos met sosiale media, jou skootrekenaar toemaak met die eerste teken van ongemak of konflik nie. Net maar op jou tande byt en probeer om geduldiger, ruimhartiger en bedagsamer te wees as wat Twitter of Facebook van jou vra.
Esha Joshi skryf tong in die kies oor vriendskappe in die aanlyn skoolkoerant van die Pinewood School in Kalifornië (): “Dis soos Valentynsdaglekkergoed: Soet op die tong, mooi om na te kyk, maar in oormaat ’n stil moordenaar.”
