Hy het sy hoërskooljare afgeskop as ’n mannetjie wat 58 kg weeg. Te klein vir die A-rugbyspan. Dus het hy vir die o.14B-, o.15B- en o.16B-span uitgedraf. “Maar daar was iets aan daardie kind. Dis moeilik om te definieer . . . Durf, volharding, hardnekkige vasberadenheid . . . ek kan nie my vinger daarop sit nie, maar hy hét dit. Dit kom van binne,” vertel
Gavin Beresford, sporthoof van die Hoërskool Tygerberg, Kaapstad.
“Toe, in graad 11, kom daai laaitie ná die Desembervakansie by die skool aan. Ek kyk . . . kyk weer. Hy het 15 cm gegroei en 20 kg aangesit. Hy weeg toe 118 kg en speel die eerste keer A-span. Omdat hy te groot vir die lynstane was (die ouens kon hom nie optel nie), skuif ek hom slot toe. Hy was vrot en daai span het nooit gewen nie. In matriek was hy nog groter, 128 kg, so ’n homp spiere met sulke lang arms en bene. Sy liggaam het so vinnig ontwikkel, sy hart en longe kon hom nie op die veld dra nie. Daar was mense wat gesê het hy hoort nie in die A-span nie. Toe begin sy lyf, hart en longe mekaar vind. Sy kop ook – hy begin in