KORTOM
■ Die spesialisraad oor presisieverbouing wat Danie Bester én die bekroonde Amerikaanse saaiboer Kevin Kalb vir medeboere het, is prakties en uitvoerbaar.
■ Doen alles binne jou vermoë om vir die natuur se aanslae te probeer vergoed.
Draai jou rug op die natuur en jy sien jou agterwêreld, want die natuur se invloed beloop ruim 60% by enige gewas se sukses. Alles wat met die natuur en weer te doen het, moet dus saam met ander faktore in ag geneem word wanneer ’n boer sy oes beplan, meen Danie Bester, boer van Balfour in Mpumalanga.
Tegnologie se vinnige pas wat kultivars en werktuie betref, maak groter oeste moontlik in die stryd wat terselfdertyd teen stygende produksiekoste gevoer word. Daarom is noukeurige aandag aan die basiese beginsels van gewasverbouing noodsaaklik, anders sal die oes misluk.
As die weer egter nie saamspeel nie en die reën bly weg of stort in soveel oorvloed neer dat die oes versuip, kan die boer niks daaraan doen nie. Maar as hy alles verder reg gedoen het, kan hy darem daarop roem dat hy alles in sy vermoë gedoen het om ’n suksesvolle oes te verseker.