‘EK WIL nie pla nie, Juffrou, maar ek wil ’n groot guns vra,” groet ek toe ek voor juffrou Charles se tafel stop. Ek weet sy het nie veel ooghare vir my nie.
“Goeiedag, Latifa. Aan wat het ek die eer te danke?” vra onse Engelse juffrou in haar ek-gaan-jou-maniere-leer-stem.
“Ek wil ’n guns vra.”
Juffrou Charles slaan haar leesboek toe. Pride and Prejudice, natuurlik. Sy is Lucy se gunstelingonderwyser vir ’n rede. “Ek verstaan so, ja.”
Dis nie ’n ja of nee nie. Ek lek oor my lippe. “Ek verstaan Juffrou het van daardie outydse rokke.” Ek wys na die boek. “Soos in Pride en Prejudice.”
Dit kry haar aandag. “Ja, ek het. Waarom vra jy?”
“Dis vir Lucy.”
Vier jaar se geveg teen kanker en gister moes ek erken my suster is tog besig om te sterf.
“Dis ’n slegte week.”
Juffrou Charles sit ’n boekmerk
