Waar daar ’n rokie trek
WIE is sy nou om te stry? dink Riekie Goosen ingedagte. Die ander ma’s het heel duidelik behoorlik huiswerk gedoen. Sy kan partykeer net kopskud oor alles wat hulle kwytraak. Sy ken die meeste van hulle sedert hul spruite van gr. 1 af in dieselfde klas is.
Dit is nou al gewoonte om elke dag onder die groot boom by die skoolhek bymekaar te kom terwyl hulle wag vir die klok om die einde van die skooldag aan te kondig. “Ek sê julle, meneer Bouwer en klein Mienke se ma is besig met dinge waarmee hulle nie besig moet wees nie,” laat Anna Kleynhans van haar hoor. Met haar kort, helderrooi hare en uitspattige uitrustings trek sy aandag waar sy ook al gaan. Sy is gewoonlik die voorbok wanneer dit kom by “feite uitruil”, soos sy dit noem.
Die res van die groepie is ywerig om gepaste kommentaar te lewer.
