Klante gaan nie uit patriotisme of simpatie plaaslike produkte koop nie: Hulle weet wat in die wêreld beskikbaar is en verwag dieselfde hoë standaarde van dit wat plaaslik geproduseer word.
Daarmee saam kom daar darem voordele vir plaaslike vervaardigers, meen Carel van Niekerk junior, een van die eienaars van Piket Implemente, ’n plantervervaardiger van Piketberg.
“Ons ken die mark, ons praat die taal en verstaan die verspreidingsopsies.”
Dié vierdegeslag-sakeman van die Swartland beantwoord vrae oor hul familie-onderneming, Piket Implemente.
Piket Implemente kom van ver af...
Ja, ons besigheid is vanjaar 90 jaar oud. My oupa Hennie van Niekerk het in 1933 ’n besigheid met die naam Van Niekerk en Krupp saam met Sam Krupp, ’n Jood wie se familie uit Litaue kom, op Eendekuil tot stand gebring. Teen daardie tyd het die Van Niekerks én die Krupps reeds diep spore in die plaaslike landbou-ekonomie getrap.
My oupagrootjie Jan Carel Horak van Niekerk het reeds in die 1920’s ’n wa-en-perdekarsaak vanaf die familieplaas Winkelshoek by Piketberg bedryf. Hy het ook landbougereedskap, meulens,
