Die gebruik van die nuutste tegnologie en noukeurige boekhouding is boaan mnr. Mario en me. Karin Metzger se lys van doendinge in hul beesboerdery 100 km oos van Gobabis. Dit geld veral rekordhouding van elke bees.
Die egpaar boer al lank met kommersiële Simbras en Simbra-stoetbeeste – sowat 50% elk – en die boerdery word in ’n winter- en somerkudde verdeel.
Sedert hulle in 1998 hul beesboerdery op Karin se erfplaas, Molly, begin het, hou hulle noukeurig rekord van elke bees. Aanvanklik was dit op skrif, maar toe hulle in 1998 hul eerste skootrekenaar gekoop het, het Mario sy eie program geskryf.
In 2005 is die program NamLITS (Namibian Livestock Identification and Traceability System) deur die ministerie van landbou beskikbaar gestel. Sedert 2010 is elektroniese oorplaatjies verpligtend.
Die Metzgers is die eerste grootveewenner van die kompetisie wat deur die Lewendehaweprodusente-organisasie (LPO) en die veevoermaatskappy Feedmaster aangebied word. Die prys word beurtelings aan ’n grootveeprodusent en ’n kleinveeprodusent oorhandig. Covid-19 het ’n tydelike oponthoud veroorsaak ná die kompetisie begin is met die aanwys van die beste kleinveeboer.
Benewens hul boerderyvennootskap is die Metzgers avonturiers van formaat. Nadat hulle eers vir ’n jaar in ’n biertuin in Duitsland gewerk en toe die wêreld vol getoer het, het
