KATRYN FOUCHÉ glimlag breed terwyl sy aan haar en Rebecca se werkery dink wat in die kombuis voorlê. Sy stap op ’n Maandagmiddag terug van die laerskool af, slegs een blok huis toe. Elke laatsomer wanneer die takke van die twee appelkoosbome agter in die erf laer begin hang van al die ryp vrugte, is dit haar werk om hulle te gaan pluk.
Wat volg is ’n grootskaalse produksie van appelkooskonfyt in die Fouchés se kombuis.
Die soete geur van appelkooskonfyt wat kook vul die huis en sweef ook na buite. Talle voetgangers voor in die pad stap stadiger en kyk rond om die bron van die geur te soek. Dit is weer daardie tyd, en Katryn het net die vorige dag die eerste appelkose begin pluk.
Rebecca, die Fouchés se huishulp, is hoofsaaklik verantwoordelik vir die maak van die konfyt, maar Katryn is haar assistent en voel ewe belangrik wanneer sy deel is van hierdie proses.
Dit het ’n