KORTOM
■ Mnr. André Brink van Groot Phesantekraal het ’n groot krisis beleef toe hy ná sy pa se dood sy sibbe moes uitkoop. Noudat die vyfde geslag op die plaas begin boer, met die sesde wat reeds op die werf speel, maak hy seker sy opvolgbeplanning is behoorlik gereed.
■ Die boerdery maak nie net voorsiening vir familielede wat tot die besigheid wil toetree nie, maar daar is ook ’n klousule om familielede te help wat ander geleenthede wil ontgin, sonder dat die boerdery benadeel word.
■ Brink glo in oop kommunikasie en skep meganismes om dit binne die familieraamwerk te bevorder.
Die landbou se beeld moet gunstig oorgedra word, glo Graan SA se Boer van die Jaar, mnr. André (Oubaas) Brink van Groot Phesantekraal naby Durbanville. “Veral nou in Suid-Afrika, waar daar soveel pessimisme is. Die landbou is tog wat die land aan die gang hou,” sê die gawe man met die priemende blou oë. Ons sit in sy kantoor in ’n buitegebou op die historiese werf van Groot Phesantekraal, wat al in 1698 aan Olof Bergh toegeken is. Dit het daarna aan die Louw-familie behoort voor Brink se transportryer-grootjie, Arend, die plaas in 1897 bekom het.