Die aand toe Natasha Lyon die stuk heuningkoek wat uit hul besproeiingsboks gekom het teen haar kombuislig hou, en haar vergaap aan die spierwit, volmaakte seshoekige selle, het haar lewe die rigting ingeslaan waarvoor sy altyd bestem was.
“Ek kon nie glo hoe lig dit was en dat dit sulke swaar heuning hou nie. Bowenal kon ek nie verstaan hoe op aarde die bye dit regkry nie. Ek móés net weet hoe hulle dit bou.”
Hoe meer sy gelees het, hoe meer wou sy weet.
“Op ’n manier is dit arrogant om dit te sê, maar ek glo dis hoe die bytjies werk. Hulle kies jou. En hulle het my gevind,” vertel die donkerkopvrou wat die “Louis Vuitton van heunings” bemark onder die Lyon Raw-handelsmerk. Verskeie kere in die onderhoud skerm sy dat dit nie oor haar gaan nie, maar oor die bye.
“Ek werk nie vir Lyon Raw nie. Dit is eerder ’n geval van die bye wat vir my die rigting aandui. Ek moet hul heilige