INLIGTING
Naam: Hartebeeshoek
Ligging: Aberdeen, Oos-Kaap
Grootte: 9 389 ha
Eienaarskap: Privaat/eenmansaak
Vertakkings: Wol, vleis en ramme
Veldtipe: Bossieveld
Reënval: Gemiddeld 250 mm, maar heelwat laer sedert 2015. In 2022 is heelwat meer reën gemeet.
KORTOM
■ Ondanks ’n moeilike begin kon dié jong boer tydens strawwe droogtetoestande in die Karoo uitbrei.
■ ’n Verandering in bestuurspraktyke met die gebruik van lamkampe tydens lamtyd het ’n aansienlike verbetering in speenpersentasie teweeg gebring.
■ Hy het belangrike boerderylesse en waardes by plaaslike boere geleer.
Dit was ’n moeilike wegspring toe mnr. Morné Fitzhenry van die plaas Hartebeeshoek naby Aberdeen in die Oos-Kaap 15 jaar gelede die plaasleisels moes oorneem. Sy pa is oorlede toe hy in graad 9 was en hy moes op 20-jarige ouderdom sy landboustudie staak om te gaan boer ná sy oupa gesê het die plaas gaan verkoop word indien niemand plaas toe gaan nie.
“Ek is ’n graaf gegee en ek het ’n tuin gebou, en sal dit graag vir my kinders wil nalaat.”
As 20-jarige op sy eie het hy voor sy kwota struikelblokke te staan gekom.
Sy ma het 700 Dorper-ooie geërf wat sy verkoop het toe sy Oudtshoorn toe getrek het, dus was die kudde baie klein en die speenpersentasie nie te waffers nie. Hy moes boonop huur betaal vir sy broer, James, se plaas, asook sy ma