Vinnige jalapeño-piekel
’n Potjie van dié geurige skyfies in die yskas is goud werd as jy vaal kos (enigiets van toebroodjies en burgers tot gebakte hoender) wil opkikker.
Genoeg vir 2 x 250 ml-flesse • Voorbereiding: 20 minute, plus 1 uur pekeltyd • Gaarmaaktyd: 5 minute
• 10 mediumgroot jalapeño’s (sowat 200 g), in skyfies gesny
• 1 lourierblaar per fles
PEKELMENGSEL
• 125 ml appelasyn
• 80 ml witsuiker
• 15 ml suurlemoen- of lemmetjiesap
• 125 ml kookwater
• ’n ruim knypie sout
• 10 ml heel pekelspeserye (gebruik ’n kombinasie van mosterdsaad, koljandersaad, wonderpeperkorrels en gemengde peperkorrels)
1 Pak die rissies en kruieblare in twee warm, gesteriliseerde 250 ml-glasflesse.
2 Meng die asyn, suiker, sap, water en speserye in ’n klein kastrol; roer oor matige hitte totdat die suiker opgelos is. Bring tot kookpunt en kook vir 1 minuut.
3 Giet die warm vloeistof oor die rissies in die voorbereide flesse en verseël dadelik (pasop vir brand!). Daar gaan ’n bietjie pekelvloeistof oorbly – ek maak eerder te veel as te min. Laat nou afkoel tot by kamertemperatuur. Hou in die yskas en gebruik soos nodig.
Wenk Ek hou daarvan om eerder kleiner flesse rissies te maak wat ek vinniger kan opgebruik nadat dit oopgemaak is.
Hoender met tuisgemaakte jalapeño-sous
Dié rissiesous is baksous sowel as bykos. Dis heerlik geurig, eerder as skelwarm – proe