ONS PAD MET DIE KONINGIN – EN NUWE KONING
DIE tyding het te gou gekom. Skaars 90 minute nadat ek die nuus vroegaand oor die radio gehoor het dat daar groot kommer oor koningin Elizabeth se gesondheid heers en haar familielede hulle na haar Skotse landgoed Balmoral haas, lees ek in die nuus: “Die koningin is dood: Wat gebeur nou?”
Nee, dink ek, dit kan nie wees nie. Dis seker net ’n berig wat skets wat sal gebeur as sy nou sou sterf, stel ek myself gerus. Maar die werklikheid dring tot my deur toe ek op TV sien hoe die amptelike aankondiging van haar dood volgens die eeue oue gebruik teen die heining by Buckinghampaleis vasgemaak word.
