‘LAAT HULLE HERLEEF’
ALLES het met ’n dooie skaap begin. Dié dier se kop, met sy manjifieke horings, het teen die muur van ’n museum in die Theodore Rooseveltpark in Noord-Dakota gehang so lank as wat Ben Novak kan onthou.
Dit is daar opgehang ter herdenking aan dié Amerikaanse president wat onthou word vir hoe baie hy vir natuurbewaring gedoen het.
Ben het naby dié nasionale park grootgeword. Hy het elke dag in die wildernis rondgeloop op soek na fossiele, en die dooie groothoringskaap teen die muur het nie juis sy aandag getrek nie – genoeg lewende skape het in die park tussen die bisons rondgeloop.
Tot Ben so 14 of 15 jaar oud was.
Hy vertel hy het toe die woorde op die gedenkplaat onder die opgestopte skaapkop gelees. En daar het hy uitgevind die groothoringskaap het eintlik jare vantevore uit dié gebied uitgesterf.
Kenners moes toe elders groothoringskape gaan soek en hulle in dié gebied kom vrylaat om die ekostelsel te laat herstel.
Ben het gewonder – as jy ’n dier na ’n streek kan invoer waar dit vroeër uitgesterf het, sal dit nie ook moontlik wees om spesies te laat herleef wat wêreldwyd uitgesterf het nie?
Hy het begin deur na die Amerikaanse trekduif te kyk. Dié voëlsoort het eens op ’n tyd so volop in die ooste van die VSA voorgekom dat hul swerms die son se strale kon blokkeer. Maar hulle is meedoënloos gejag, en in 1914 het hulle finaal uitgesterf.
“Mense het met daardie voëls
