Doener, dromer donnalee
Op honderd wil sy steeds nuwe dinge leer en ervaar en opgewonde wees oor die lewe.
Kafeïenvrye latte in die hand, gesels aktrise, vervaardiger en draaiboekskrywer Donnalee Roberts in die Chocolat Bistro in Durbanville, waar dit gesellig gons. Asof só gestileer, pas sy in by die ouwêreldse dekor in haar geblomde hoënek-rok, Alice in Wonderland-kopband en roomkleur stewels.
Haar rok is deel van haar klerereeks, The Romantic Collective. Dié aanlyn besigheid het goed gevaar tydens die pandemie. As sy nie in die filmbedryf was nie, bieg sy, was sy modeontwerper. “Ja, die ewige romantikus, dis ek.” Mooi rokke met gedrukte patrone laat ons eie Julia Robertsewebeeld breed glimlag.
Donnalee en Ivan Botha, wat in 2019 getroud is, het Suid-Afrikaners oorrompel met hul avontuurfilms Pad na jou hart (2014), Vir altyd (2016) en Stroomop (2018).
Maar in dié seisoen van hul loopbaan, ontgin hulle verskeie ander genres.
Waar baie tydens die pandemie moedeloos hande ten hemele gegooi het, het hulle verbete begin tik, konsepte rondgegooi en nagte deur gewerk. “Ons het nie geweet hoe die virus ons bedryf gaan beïnvloed nie, maar
