DRIE DEKADES LATER
DIT bly ’n sprokiesoomblik – om te sien hoe ’n jong vrou se lewe in ’n oogwink verander.
En toe sy presies 30 jaar gelede in haar wit aandrok op die verhoog by Sun City staan en hoor hoe haar naam in 1992 as die nuwe Mej. Suid-Afrika uitgeroep word, was dit vir Amy Kleinhans-Curd ’n oomblik van ontwaking – een waarheen sy haarself jare later steeds kan terugneem.
“Ek het so ’n besige kindertyd gehad en was ’n bietjie van ’n rabbedoe, maar inderwaarheid was ek ’n saadjie wat nog al die pad besig was om haar pad na die bogrond oop te druk,” vertel Amy vandag.
Sy is op 53 nog net so beeldskoon soos drie dekades gelede, en nog net so slank soos toe sy destyds in swemklere op die verhoog van die skoonheidskompetisie moes pronk.
“Die oomblik toe hulle my naam uitroep as die wenner, toe is ek soos ’n sonneblom wat haar gesig na die son draai,” voeg sy by oor die aand toe haar lewe verander het.
Haar jaar as Mej. Suid-Afrika was ook op ’n persoonlike vlak ’n grote, want dit was ook in dié jaar dat sy die liefde van haar lewe, die Nieu-Seelandse sakeman Leighton Curd (61), ontmoet het.
Vanjaar is hulle al 28 jaar getroud
