Die Inka-ryk
DIE Inka-ryk was ’n enorme ryk in Suid-Amerika wat sy glorietyd van vroeg in die 15de eeu beleef het tot sy verowering deur die Spanjaarde in die 1530’s.
Op sy grootste het die ryk ’n oppervlak van sowat 2 miljoen km² beslaan met ’n bevolking van meer as 10 miljoen mense.
Dis in uitsonderlike omstandighede tot stand gebring deur mense wat, relatief tot ander groot beskawings, weinig tegnologiese vooruitgang gemaak het. En hoewel dié ryk se bestaan van korte duur was, word sy geskiedkundige en kulturele impak tot vandag toe gevoel.
OORSPRONG
Volgens oorlewering is die Inka-heersers se voorouers deur Inti, die songod, geskep.
