AARDJIE NA SY VAARTJIE
DALK is dit sy lang, lenige lyf of sy donkerbruin hare en soel vel … Waar hy sy hart op die sportveld uitspeel, lyk die 18-jarige Suid-Afrikaner net soos ’n Europese sokkerspeler, een met sy Italiaanse oupa se bloed in sy are. Maar sien jy die doelgerigte kyk in sy oë, is hy onmiskenbaar sy pa se seun.
As die seun van die rugbyheld wyle Joost van der Westhuizen en die sangeres Amor Vittone het Jordan van der Westhuizen voor Suid-Afrikaners se oë grootgeword.
“Dit het my nooit gepla dat my ouers bekend is nie. Al wat ek weet, is dat ek die beste wil wees wat ek kan wees, vir wie ek is en nie oor wie my ouers was nie,” sê Jordan in sy eerste eksklusiewe onderhoud met Huisgenoot vanuit Valencia, Spanje.
Daar in die Spaanse stad met sy bekoorlike ou geboue en Mediterreense strande het hy kort voor sy 18de verjaardag in Januarie by die Valencia-sokkerakademie aangesluit. Aanvanklik sou dit net twee weke wees, maar hul bestuur en afrigters was so beïndruk met sy spel en vaardighede dat hulle hom gevra het om minstens tot die einde van die jaar daar te bly.
“Ek kon dit nie glo nie, want dit was nog altyd my droom om in Europa sokker te speel, en nou het dit waar geword,” sê hy.
Die paadjie wat hy tot hier uitgekerf
