50 rooskleurige jare
In Suid-Afrika het rose sinoniem geword met Ludwig’s Roses. Vanjaar vier dié roosplaas noord van Pretoria sy 50ste verjaardag. Anke Nothnagel het met haar notaboek en kamera by die pionier en ghoeroe Ludwig Taschner gaan inloer.
Dit is vroeg op ’n Vrydagoggend en die dou lê nog vars onder jou voete. Plek-plek sien jy mense in rooi baadjies wat al hard aan die werk is met hulle groen vingers. In die lug hang die soet geur van rose…
Dit is waar jy die afgelope 50 jaar al vir Ludwig Taschner op sy pos kry – tussen die rose, met sy snoeiskêr in sy sak.
As kind het Ludwig in ’n kwekery op die dorpie Osterwieck in Duitsland grootgeword en sy ambag as kweker voltooi. Nadat hy teen 1960 uit Oos-Duitsland gevlug het, het hy in kwekerye in Wes-Duitsland, Switserland en Engeland gewerk.
Maar daar was die roepstem van Suid-Afrika. “As jy ’n kweker is of belang stel in plante en tuine, dan is Suid-Afrika altyd iewers op die horison, want hier kry