VELSORG VIR TIENERS
PUISIES kan vir enigeen op enige ouderdom ’n verleentheid wees, maar in jou tienerjare kan die stryd teen aknee veral frustrerend wees.
Al is daar talle faktore wat aknee veroorsaak, is jong volwassenes meer geneig om ’n uitbreking van puisies te kry weens die verhoogde afskeiding van hormone.
Die goeie nuus is dat tieners se velselle vinniger hernuwe word en dat hul vel veerkragtiger as volwassenes s’n is; daarom herstel hulle vinnig van ’n uitbreking van puisies.
WAT IS AKNEE?
“Aknee is net ’n mediese term vir puisies. Of jy nou een puisie of baie het, dit word steeds aknee genoem en het niks te doen met die erns van die toestand nie,” sê dr. Tarryn Jacobs, ’n dermatoloog van Pretoria.
Aknee is deels geneties, deels hormonaal, en hou grootliks verband met puberteit.
