ALANA: BAAI BAAI, HONEY BOO BOO
SY WAS ’n parmantige pokkel van vyf jaar oud toe sy kykers se harte die eerste keer gesteel het met haar kordate houding en gevatte sêgoed.
Honey Boo Boo, soos sy alombekend geword het, was gou een van die sterre van Toddlers and Tiaras, die werklikheidsprogram waarin ouers feitlik enigiets sal doen om hul kinders in prinsessies om te tower om ’n voet in die deur na die glansryke wêreld van skoonheidskompetisies te kry.
En of dit nou danksy haar bekkigheid was of nie: Die jong Honey Boo Boo, oftewel Alana Thompson, het inderdaad ’n paar skoonheidstitels vir juniors gewen. Kykers kon nie genoeg van dié klein rissiepit kry nie.
