VERLIEF OP Success
Success Lekabe (31) is een van die gasvroue van die gewilde Tussen Ons-kletsprogram en ’n omroeper op Bok Radio. Sy is sexy en stralend en het nie iemand aan haar sy nodig om haar te laat blom nie. Jy kan haar amper beskryf as suksesvol single.
Tog glo sy steeds in die liefde.“Ek is ’n hopeless romantic. Ek glo in liefde, en ek glo dis nie liefde wat mense seermaak nie. Mense maak mekaar seer met insecurities, issues en tekortkominge wat ons saam in ’n verhouding invat. Die liefde is net mooi. En dis ’n relatiewe term, want dit beteken verskillende goed vir verskillende mense.”
Vir haar is liefde ’n veilige hawe. Dit is soos die Bybel dit beskryf – geduldig en onvoorwaardelik.“Dit is ’n plek waar jy jouself kan wees, foute kan maak en kan groei sonder om veroordeel te word.”
Sy sê niemand is perfek nie, maar as jy dié soort karaktereienskappe en gesindheid kan uitleef, kan jy werklik liefhê.
MAAK SEKER JOU HART IS GESOND EN JY IS STERK VOORDAT JY IN ’N VERHOUDING STAP.
SUCCESS LEKABE
