Energie is die vermoë om werk te verrig. Dit kan ook beskou word as die krag wat beweging of handeling teweegbring. Ons sien die uitwerking van energie oral. Plante gebruik son-energie om te groei. Karre gebruik petrol (chemiese energie) om van die een plek na die ander te ry. Selfs terwyl jy nou hier lees, gebruik jy die energie uit die kos wat jy geëet het om te beweeg en asem te haal.
Die eerste wet van termodinamika behels dat energie nie geskep of vernietig kan word nie, maar dat dit van een vorm in ‘n ander verander kan word. Kom ons bekyk ‘n paar energiebronne van naderby en stel vas watter rol hulle in ons lewe speel.
