’N TYD VIR HEEL WORD
DIT sou maklik wees om in dié tyd van die coronakrisis oor die pynlike houe te sit en tob wat die lewe die afgelope tyd vir haar uitgedeel het. Die lang dae tuis skep die tyd en ruimte om na te dink oor als wat skeefgeloop het en als wat bly verwond.
“Verwonding” – so verwys sy na die seer van haar verbrokkelde huwelik. En daardie seer verdwyn nie oornag nie.
In die weke wat getroude pare oor die hele land moet leer om aldag en heeldag onder dieselfde dak in mekaar se geselskap te wees, moes sy – die bekende huweliksraadgewer wie se eie huwelik ná 26 jaar verbrokkel het – die uitdagings van inperking en afsondering sonder haar maat aandurf.
Maar al word Gretha Wiid (48) nog daagliks gekonfronteer met “ ’n enorme verlies” nadat sy verlede November bekendgemaak het sy en die pa van haar vier kinders, Francois (48), gaan skei, lê die seer haar nie lam nie. Sy vang haarself dikwels waar sy weer sorgeloos lag.
Tog draai sy nie doekies om nie – dis nie elke dag maklik nie, erken sy. “ ’n Mens wil dikwels so maklik jou verwonding met ’n geestelike sousie toegooi. ’n Mens wil sê: Ek is mos ’n kind van die Here – ek is heeltemal oukei. Maar dis nie hoe genesing werk nie. Dis ’n lang pad,” erken sy kort voor die 50ste dag van die landwye inperking.
Sy is deur diep waters sedert sy haar man vir ’n egskeiding gedagvaar het
