Daar’s ’n slang in die gras

Wat is die grootste moeilikheid waarin jy al ooit was? Myne was die keer toe ek amper die dorp afgebrand het – ’n konflagrasie in die middel van die besigste naweek in dorpsen menseheugenis. Maar laat ek voor begin.

Anderhalwe dekade terug was my vlerk nie af nie, maar goed skeef geval. Ek het die stad gelos, ’n dorp mank ingestrompel vir ’n hoekie iewers waar ek my wonde kon lek en wag tot ek weer kans sien. Honde en mense wat in die Chinese jaar van die hond gebore is, maak so.

Ek het na die regte plek gekom. Die dorp is só ver uit die pad dat dit nie eens op alle padkaarte voorkom nie. Bekyk dit vanuit Google se hoogtes en jy sien net dowwe kolle, asof die foto’s geneem is toe satelliete nog