Ons eet #SAAM

1 Vertel my meer van SAAM?

SAAM is ’n vrolike viering van gemeenskapskookboekies en die kultuur om resepte met mekaar te deel. Dit eer die wonderlike gees van samewerking tussen vroue wat vir hul gemeenskap iets goeds wou doen en hul resepte gebruik het vir geldinsamelings – of dit was om ’n kerksaal te bou of ’n skoolbussie aan te skaf. Ja, daai einste “kerkboekies” wat ons ma’s en oumas nader getrek het vir die lekkerste huiskos en betroubare resepte.

SAAM plaas die kollig op ons verknogtheid aan hierdie beskeie boekies met hul geelgebleikte omkrulblaaie vol kosvlekke, tipies met krammetjies gebind of ’n spiraalrug, en netjies uitgeskryfde of getikte resepte. Sonder kosfoto’s, behalwe dalk ’n lynskets hier en daar.

Ek het uiteindelik 150 boekies nagegaan, die oudste uit 1918 en die jongste 2018. Die boekies is van kerke se sustersen vrouediensverenigings, huisvrouligas, vrouelandbouverenigings en -unies, skole, sinagoges, rolbalklubs, “ van die Rotariërs en Lions, organisasies vir gestremdes