’N SKOON BLADSY
WEEK ná week, jaarin en jaaruit, oor byna twee dekades heen … Dit is hoe lank sy ons voor die kassie vasgenael gehou het.
Devi Sankaree Govender, die vurige aanbieder van die M-Net-aktualiteitsprogram Carte Blanche, was en bly die verpersoonliking van dinamiet in ’n klein pakkie.
Vra maar vir die arme drommels wat al voor die kameras in haar visier was. Van kabinetsministers tot maatskappybase wat moeilike kwessies probeer systap tot vermeende bedrieërs wat probeer wegskram.
Dié vreeslose ondersoekende joernalis van skaars 1,5 m hoog laat almal met haar vlymskerp vrae kriewel.
