Fi a Joe Allen

By Manon Steffan Ros

Marc does not have a good relationship with his father, but all this changes for the better when they both go to France to follow the Welsh football team. For good readers at the higher end of KS2 and years 7-9.

• Language: Cymraeg
• Publisher: Y Lolfa
• Release date: Jul 13, 2018
• ISBN: 9781784616212

Manon Steffan Ros

Catherine Fisher is a poet and children’s author who lives in Newport, South Wales. A leading fantasy writer, her bestselling books include the Clockwork Crow trilogy, the Snow-Walker trilogy, the Oracle trilogy, and the Incarceron series. She was the first Wales Young People’s Laureate.

Book preview

1

Y gôl berffaith.

Y math o gôl dach chi’n aros drwy gydol eich bywyd amdani.

Dwi ddim yn dweud ’mod i’n bêl-droediwr anhygoel. Nid fi ydi’r gorau yn ein blwyddyn ni – dim yn fy nosbarth i, hyd yn oed. Ond roedd hon yn gôl y byddai Gareth Bale yn falch ohoni. Wir yr.

Roedd hi wedi bod yn gêm ddigon diflas tan hynny – 0–0 ar ôl 84 munud. Roedd tîm Aberiorwg yn well na ni fel arfer, ond doedd ’na ddim fflach ynddyn nhw heddiw, a dim siâp sgorio arnon ninnau chwaith. Roedd pawb wedi cael llond bol, ac er ei bod hi’n ddydd Sadwrn braf ym mis Mai, roedd hi’n oer ar gae pêl-droed y Glan. Safai’r rhieni ar ochr y cae yn edrych wedi diflasu’n llwyr, a hyd yn oed y rhai sy’n arfer gweiddi a rhegi o hyd yn dawel heddiw. Roedd Dad wedi sôn ei fod o am ddod. Byddai’n dod i weld gêm pan oedd hi’n braf, ac os nad oedd o’n rhy brysur. Wrth gwrs, roedd Mam yn sefyll yno, fel y byddai’n gwneud bob un dydd Sadwrn.

Ac yn sydyn, fe ddigwyddodd o.

Dion wnaeth basio’r bêl ata i. Roeddwn i ar yr asgell, ac er na fyddwn i’n cyfaddef hyn i neb, roeddwn i’n gobeithio na fyddai unrhyw un yn pasio’r bêl i mi, gan ’mod i wedi blino gymaint. Ond doedd Dion ddim eisiau’r bêl chwaith, felly fi cafodd hi, a symudais draw i gyfeiriad y gôl, yn disgwyl i un o hogiau Aberiorwg fy nhaclo i. Ond rhywsut, a does gen i ddim syniad sut, llwyddais i osgoi dau ohonyn nhw.

Roedd pethau’n dechrau mynd yn ddiddorol.

Ond roeddwn i’n dal yn gorfod mynd heibio amddiffynnwr gorau Aberiorwg, oedd yn brysio tuag ata i. Curai fy nghalon yn uchel dan fy nghrys, a theimlais ryw egni arbennig yn llifo drwy ’nghorff i gyd, yn enwedig yn fy nghoesau. Edrychais i fyny. A ddylwn i gymryd y gic rŵan? Na. Roedd o’n rhy bell. Mewn dim o dro, roedd yr amddiffynnwr o ’mlaen i, ei droed chwith yn ymestyn am y bêl. Roedd o’n rhy agos – fedrwn i mo’i osgoi o.

Cyn i mi gael amser i feddwl am y peth, roeddwn i wedi penderfynu beth oeddwn i am ei wneud. Ro’n i wedi gwylio pêl-droedwyr fel Messi a Pelé yn ei wneud o gannoedd o weithiau ar y we, ond doedd hogiau deuddeg oed fel fi ddim yn gwneud hyn. Ond dyma wnes i:

Tarais y bêl yn ysgafn gydag ochr fy esgid, trwy goesau’r amddiffynnwr, cyn symud yn sydyn er mwyn nôl y bêl o’r ochr draw. Megsho maen nhw’n galw hynny. Yna, heb feddwl am y peth, saethais at y gôl – y gornel uchaf, ar y chwith – a dyna ni. Gôl y ganrif.

Rhuthrodd yr hogiau draw a neidio arna i dan weiddi.

Welais i ’rioed neb yn megsho fel’na o’r blaen! meddai un ohonyn nhw, ac mae’n rhaid i mi gyfaddef, dyna oedd eiliad gorau fy mywyd.

Roeddwn i’n arwr.

Troais i edrych ar y dorf, a ’ngwyneb bron â chracio efo gwên fawr. Roedd y rhieni i gyd yna, pawb yn clapio a chodi bawd, ambell un yn gweiddi Da iawn ti! neu Nais won, Marc! Roedd Mam yn neidio i fyny ac i lawr, a gwên lydan ar ei hwyneb. Wnaeth hi ddim gweiddi, ond roeddwn i’n gallu dweud ei bod hi’n ofnadwy o falch.

Doedd Dad ddim yna.

Fy ngôl i oedd yr unig un yn y gêm. Glannant 1, Aberiorwg 0. Biti garw nad oedd unrhyw un yn ffilmio gyda’u ffôn, achos mi fyddwn i wedi gallu gwylio’r gôl yna drosodd a throsodd heb flino arni byth.

Roedd pawb yn glên ofnadwy efo fi yn yr ystafell newid, yn enwedig yr hyfforddwr. Fi oedd arwr mawr y dydd. Doeddwn i ddim eisiau gadael, hyd yn oed ar ôl newid ac ar ôl i bawb arall ddechrau gadael.

Safai Mam y tu allan yn aros amdana i. Rhuthrodd ata i a rhoi sws fawr i mi, a rhoi ei breichiau o ’nghwmpas.

O Marc! Roedd hynna’n anhygoel!

Diolch.

Na, wir yr i ti rŵan. Welais i ’rioed ffasiwn gôl mewn bywyd go iawn. A ti wnaeth ennill y gêm!

Wnaeth Mam ddim stopio siarad am y peth yr holl ffordd i’r siop, wrth iddi roi pethau yn y fasged, ac wedyn yr holl ffordd adref. Erbyn i ni gyrraedd ein tŷ ni ar Lôn Popty, roedd hi wedi ’nghymharu i efo Gareth Bale, Neymar, Ian Rush a Maradona! Eisteddais ar gadair yn y gegin, wedi ymlâdd ar ôl y gêm. Tarodd Mam y tegell ymlaen, a dechrau rhoi powdr siocled poeth mewn mygiau i ni’n dau.

Wnaeth Dad ffonio? gofynnais, gan drio peidio swnio fel bod ots gen i o gwbl.

Naddo, atebodd Mam a’i chefn ata i, a hithau’n trio swnio fel petai hithau ddim yn malio chwaith. Falla wneith o ffonio wedyn. Neu, mi gei di ddanfon neges iddo fo ar dy ffôn. Bydd o wrth ei fodd yn clywed am y gôl ’na!

Ond wnes i ddim. Doeddwn i ddim am ei styrbio fo os oedd o’n brysur.

Dwi’n mynd i gael cawod cyn y gêm, dywedais wrth Mam ar ôl gorffen y siocled poeth. Roedd Cymru’n chwarae Slofacia, ac roedd Mam wedi prynu pitsa mawr i ni gael ei fwynhau wrth wylio.

Codais ar fy nhraed.

Hei, meddai Mam, a throais i edrych arni. Roeddat ti’n well na’r Mark Hughes gwreiddiol heddiw, sti.

Gwell i mi esbonio.

***

Marc Huws ydw i. Dwi’n ddeuddeg oed ac yn byw ym Mangor efo Mam. Roedd Dad yn byw yma efo ni tan oeddwn i’n saith oed, ond wedyn fe wahanodd Mam a Dad. Mae o’n byw yng Nghonwy bellach, sydd dim ond ryw hanner awr i ffwrdd yn y car. Dwi’n mynd i aros yn ei fflat o weithiau, ond ddim yn aml iawn. Mae o’n ddyn prysur. Mae ganddo fo swydd bwysig, rhywbeth i’w wneud efo gwerthu cyfrifiaduron i gwmnïau mawr. Gofalwraig ydi Mam, sy’n mynd o gwmpas tai hen