Hoe het My Kalahari Collection ontstaan?
Toe ek en Barri getroud is en op Merriespan, 130 km noord van Upington en sowat 70 km van Askham, met Meatmaster-skape, kruisrasbeeste en wild kom boer het, was ek ’n troufotograaf. Aanvanklik was dit heeltemal moontlik, selfs al moes ek ver ry om troues af te neem. Maar ná die geboorte van ons kinders (ons het vier!) het dit moeiliker geword om ’n vrywilliger te kry om hulle op te pas. Ná my derde kind het ek dus opgehou, en ná my jongste se geboorte het die idee begin posvat om iets te kry wat ek en my kinders ná skoolure kan doen (ons is ’n tuisskool-gesin). Ek wou my kennis van fotografie en grafiese ontwerp toepas, ons wou ’n sakgeldjie verdien en ek wou die kinders terselfdertyd oor besigheid leer. Ek het gedink aan iets wat ons aan die toeriste kan verkoop wat deur ons gebied beweeg. Een oggend het ek op sosiale media op ’n advertensie afgekom vir ’n kursus wat jou leer om T-hemde van jou huis