’OUKEI, aan die begin was dit ’n werk. Ek het die werk baie nodig gehad.
My eerste pos as olifantoppasser was by Wild Horizon. Ek was desperaat, en toe stel ’n vriend my aan hulle bekend. Ek sal erken ek was nie van die begin af mal oor olifante nie. Ek het nie verstaan hoekom ons heeltyd by hulle moes wees nie.
Maar nou ja, dit was werk. Ek moes eers net hulle stalle skoonhou. Kan mens dit ’n stal noem? Hulle blyplek. Later moes ek help kos soek. Ek moes takke met blare aan afsny en dit in hulle stalle gaan sit.
Eindelik het ek saam met hulle in die bos gaan stap.