Veldrehabilitasie
Hy dink hy is die enigste ou ter wêreld wat bietou onder drupbesproeiing kweek. Dít is ’n akkurate opsomming van Mattie Oosthuizen se benadering tot veldverbetering. Dié afgetrede ingenieur sal hom nie deur enige beperking laat onderkry om die veld op sy plaas te omskep in funksionerende ekostelsels wat altyd besig is om te verbeter nie.
Toe hy Droomplaas by Barrydale in November 2013 gekoop het, het die meer as 500 bokke van die vorige eienaar die veld “morsdood” gevreet. “Hier was amper nie eens ’n Scholtzbossie (besonder onsmaaklike plant) nie, net grond, rots en slote.”
Mattie het eers ’n huis gebou en toe begin om die 16 km-grensheining van die 1 200 ha-plaas te herstel. “In 2015 het ek net drade reggemaak. Dit voel vir my ’n plaas moet darem ’n draad om hê.”
Dieselfde jaar het dit só baie gereën dat die Poortjieskloofdam, nie ver van sy plaas
