DIE vrou met die helderblou strepe in haar hare en gehekelde sjaal lyk nie noodwendig soos iemand wat al sedert 2007 ’n toestel in haar lyf het wat deur “aliens” daar geplant is nie.
Maar dis presies wat die aliens sou wou hê ons moes dink. En soos ek gereeld by die Awakening UFO & Conscious Life Expo gehoor het: Om die aliens uit te oorlê, moet ons soos hulle dink.
Derrel W. Sims stem saam. Hy reageer op die vrou se bewering deur sy cowboyhoed te lig en haar aan te staar – dieselfde kyk waarmee hy ’n buiteaardse wese uitgedaag het toe hy op vier die eerste keer deur een ontvoer is.
Hy pluk sy draagbare infrarooikamera soos ’n rewolwer uit sy sak. “Wel, ma’am, ek skat ons sal moet uitvind.”
Derrel is 75. Danksy sy uitrusting, snor en algemene windgatgeit kan ’n mens hom van ver af as ’n Texan uitken. Hy is ook ’n “alien hunter” van beroep. Én ’n hipnotiseur, privaat speurder, handskrifontleder, gewese CIA-agent en – iets moet die rekeninge betaal – af en toe ’n eiendomsagent. Hy het boonop ’n swartbelt in karate. “Need someone to handle a tough situation?” staan op sy visitekaartjie oor ’n dekades oue foto waarop hy ’n tier op ’n grasperk vaspen.
Die inplanting is in haar hand, sê die vrou. Derrel vra sy moet haar juweliersware afhaal sodat hy toetse kan doen. ’n Klein skare kyk toe. Sy staan botstil en hou haar pols uit. Eers word die kamera daarteen gehou om te sien of daar ’n hittebron is. Daarna ’n geigerteller, wat bestraling monitor. Dan ’n “magneetbespeurder”, wat ek